Lýsing
Royal peysan er stutt með víðum ermum og er prjónuð í hring, ofan frá og niður. Hálsmálið er prjónað fyrst í tvöfaldri lengd, brotið saman og prjónað niður. Berustykkið er mótað með 5 jöfnum útaukningum ásamt því að upphækkun er prjónuð aftan á hálsmáli með stuttum umferðum. Þegar berustykki er lokið eru ermar settar á hjálparbönd, bolurinn prjónaður áfram og endað í mynsturbekk sem innifelur úrtökur og stroff. Því næst eru ermalykkjur teknar af hjálparbandi og ermar prjónaðar þar til endað er í áþekkum mynsturbekk og í bolnum, nema með ólíkri úrtöku.

Uppskriftin er hönnuð þannig að þægilegt er að lengja bol eða ermar sé þess óskað.

Stærðir
XS (S) M (L) XL (XXL)
Bringumál: 80 (86) 93 (99) 106 (108) cm
Yfirvídd peysu: 87 (93) 100 (107) 113 (120) cm
Ermalengd: 47 (47) 48 (49) 49 (50) cm
Ermavídd: 40 (40) 40 (47) 47 (47) cm
Sídd peysu frá hálsmáli: 39 (40) 41 (43) 45 (46) cm

Athugið að stærðin XXL hefur ekki verið prufuprjónuð, einungis vel rýnd. Hafðu samband ef þig langar að prufuprjóna þessa stærð.

Garn og prjónar
Peysan er prjónuð úr Håndværksgarni frá Hjelholts Uldspinderi (100 gr = 200 m), en nota má annað garn með áþekka prjónfestu sem heldur sér vel, t.d. Léttlopa eða annað ullargarn.

Prjónfesta: 18 lykkjur x 22 umferðir = 10 x 10 cm á 4.5 mm prjóna.

Mælt er með því að gera prjónfestuprufu, þvo hana og mæla áður en hafist er handa við prjónið til að kanna hvort að lykkju- og umferðafjöldi standist. Ef önnur víddin er of há og hin of lág, má vera að það lagist við að þvo peysuna og leggja hana til. Ef hins vegar bæði lykkju- og umferðafesta eru of háar eða of lágar þarf að fara upp eða niður um prjónastærð.

Áætluð garnþörf:
300 (350) 350 (450) 500 (550) g af lit A og
100 (100) 100 (100) 150 (150) g af lit B.

Prjónar:

• 4.5 mm hringprjónn af lengd 100 cm
• 4.5 mm hringprjónn af lengd 40 cm
• 4.5 mm sokkaprjónar

(Eða prjónastærð sem gefur rétta prjónfestu)

Ath: Hægt er að nota 100 cm hringprjóninn til að prjóna alla peysuna ef Magic loop aðferðin er notuð

Aukahlutir:

• 2 prjónamerki