Strandahyrna dregur nafn sitt af Hornströndum, en innblásturinn að mynstrinu fæddist á göngu um það ævintýraland, nánar tiltekið Hesteyri og dagleiðirnar þar í kring.
Litbrigðin í spegilsléttu hafi sem mætir ljósri strönd á annan veg og himninum á hinn, kröftugir brúskar hvannarinnar og blágresið inn á milli.
Kaflarnir í sjalinu draga þannig nöfn sín af náttúrunni; sjór, strönd, blómabreiður og himinn. Ef rýnt er í mynstrið sést að náttúran birtist í raun á hvolfi þegar sjalið er borið á öxlunum. Það var svosem ekki viljandi, en þar sem Vestfirðir eru frægir fyrir sínar yfirnáttúrulegu spegilmyndir á haffletinum gæti ég alveg eins sagst hafa verið að lesa myndina úr sjónum. Segjum það bara.